Tag Archives: पाहीमाफी

पहीमाफी [१३] : दहिजरा कलाही कलपावै

आशाराम जागरथ रचित ग्रामगाथा ‘पाहीमाफी’ के  “पहिला भाग” ,  दुसरका भाग  , तिसरका भाग , चौथा भाग , पंचवाँ भाग , ६-वाँ भाग , ७-वाँ भाग , ८-वाँ भाग , ९-वाँ भाग१०-वाँ भाग  , ११-वाँ भाग , १२-वाँ भाग के सिलसिले मा हाजिर हय आज ई १३-वाँ भाग :

पाहीमाफी कय ई तेरहवाँ भाग हाजिर हय। दुरभिच्छी मा गाँव कय हालत यहिमा बयां कीनि गय हय। अकाल-दुर्भिच्छ कबिता कय बिसय बनत हय तौ यक चुनौती ई हुवत हय कि कहाँ ले विवरण रखा जाय, औ कहाँ ले संवेदना उभारी जाय! कबि कय मंतब्य केतना आवय औ केतना लेगन कय राय आवय! पाहीमाफी कय कवि घटना चुनै के मामिले मा एलर्ट अहय। ऊ अस घटनन का चुनत हय जिनसे घटना कय गतिकी आयि जाय, साथे-साथे घटना खुदै मा कमेंट बनि जाय। कयिउ दाँय तौ कबि-मंतव्य यहि तरह आवत हय कि वहिकय संगति सहजै सोसित पात्र से होइ जाति हय। पात्र बोलय तौ समझौ कबि बोलय, कबि बोलय तौ समझौ पात्र बोलय। मसलन नीचे दीन पँक्ति कविता बिना इनवर्टेड कामा के दीन गै अहयँ, जौन कि ठीकौ अहय : 

यक्कै थैली से जनम लिहेन
बेगानी हम दुई आंखी मा.
ध्वनि/नाद, अनुप्रास, के्र सहायता से काव्यत्व लाउब पाहीमाफी मा कम हुअत हय मुला ्जहाँ हुअत हय बहुत जमि जात हय। अलंकार जब अनायास आवय तब ऊ सबसे ज्यादा सार्थक हुअत हय। जैसे इन पंक्तियन का देखिके यहि बात कय अनुमान कीन जाय : 
बोलौ ना पुक-पुक पुकुर-पुकुर
जिउ धड़कै धुक-धुक धुकुर-धुकुर
मलकिन-सहुवाइन कै भाखा
नाहीं-नाहीं नानुकुर-नुकुर….
आलोचक रामचंद्र सुकुल कय मानब हय कि नाद सौंदर्य से कबिता कय आयु बाढ़त हय। अवधी कबिता मा जब नाद सौंदर्य आवत हय, ऊ अऊर बियासि जाति हय। : संपादक
___________________________________________________

  • दहिजरा कलाही कलपावै

येक  साल ना भै बरसात
परा कलाही दिन और रात
खात-खात जिउ जाय कचाय
जोन्हरी क् रोटी कोदई क् भात
मोर भुखिया मोर माई जानैं
भरा कठौता आटा सानैं
यक्कै जूनी मिलै खाय कां
भरि कै पेट खियाय क् मानैं
सड़ा-गला गल्ला बनिया कै
लावैं रोज उधारी मा
यकतनहा नीम कै पेड़ गवाह
बचा बा पाहीमाफी मा

यक रोज कहारेन के टोला
चूल्ही भीतर झगरा होइ गै
मरदा बोलिस ई पेटकटिनी
भरि पेट न खाना हमैं दियै
उठि कै यक झापड़ मारि दिहिस
गुस्साय कै झोंटा खीचि लिहिस
तब दांत पीसि कै मेहरारू
नीचे से फोता पकरि लिहिस
‘दहिजरऊ मोंछ उखारि लियब
तोहरे पुरखन की दाढ़ी मा’
यकतनहा नीम कै पेड़ गवाह
बचा बा पाहीमाफी मा

जोरू हमार सोवै जानै
बस आपन पेट भरै जानै
भुखमरी भी अइसन चीज हुवै
बिन लेहें परिच्छा ना मानै
हम फुरै कहिअ थै देखि लियौ
मुड़वारी तोपे धरे रही
राती मा तकिया फारि-फारि
यक कूकुरि रोटी खात रही 
जे सुनै उहै हँसि-हँसि लोटै
केव बोलै ना वकरे हक़ मा
यकतनहा नीम कै पेड़ गवाह
बचा बा पाहीमाफी मा

भुखमरी नचावत नाच रहा
रोटी कै बन्दर बाँट रहा
देवरानी अउर जेठानी के
बीचे झगरा होय जात रहा
सब जानिअ थै तू जेस बाट्यू
दुई आँखी काम करत बाट्यू
पातर रोटी सबके आगे
मरदे कां मोट दियत बाट्यू
बनि गयू निर्दयी काव कही
बुद्धी भरभस्ट कलाही मा
यकतनहा नीम कै पेड़ गवाह
बचा बा ‘पाहीमाफी’ मा

संझा – भिन्नहीं रोज आवै
दहिजरा कलाही कलपावै
बनी रोटी चरी-बाजरा कै
टूका-टूका मा बंट जावै
रिरियायं गेदहरे बहुत घरे
महतारिन रोय-रोय डांटैं
भेली-ककई रस घोरि जियैं
जइसै–तइसै सब दिन काटैं
सोना के भाव सुहाय सड़ा
गल्ला मिलि जाय मजूरी मा
यकतनहा नीम कै पेड़ गवाह
बचा बा ‘पाहीमाफी’ मा

बोलौ ना पुक-पुक पुकुर-पुकुर
जिउ धड़कै धुक-धुक धुकुर-धुकुर
मलकिन-सहुवाइन कै भाखा
नाहीं-नाहीं नानुकुर-नुकुर
कउनौ ना तरी-तापरी बा
यक्कौ धुर खेती नाहीं बा
अब करै मजूरी कहाँ जाय
सबके घर परा कलाही बा
पी लियौ पसावन चउरे कै
पायन कोटा सरकारी मा
यकतनहा नीम कै पेड़ गवाह
बचा बा ‘पाहीमाफी’ मा

खाय बिना घर रगड़ा होइगै
सास-पतोहे म् झगरा होइगै
मिटै न खइंहस रोज रोज कै
चूल्हा मा अलगौझा होइगै
तोर नइहर मोर जाना बाय
नौ सै गदहा बान्हा बाय
खरी बात मौसी कै काजर
कहकुत बहुत पुराना बाय
बूढ़ा सुसकैं भुनभुन-भुनभुन
काकुन कूटैं काँड़ी मा
यकतनहा  कै पेड़ गवाह
बचा बा ‘पाहीमाफी’ मा

कहरैं, खासैं खटिया पकरे
बुढ़ऊ मिनके वलरे-वलरे
भइया कां तनी बोलाय दियौ
तू चली जाव निहुरे-निहुरे
पाँव पसारौ जेतना चादर
बाँटा पूत पड़ोस बराबर
बना चौधरी रह्या जनम भै
घर कै मुरगी साग बराबर
पेटपोछवा यक बेटवा पायन
भांग परि गवा बुद्धी मा
यकतनहा  कै पेड़ गवाह
बचा बा ‘पाहीमाफी’ मा

बेईमान बनियवां सत्तियार
पाथर तउलै धइ बार-बार
गुरबा-गरीब बिसहै आवैं
तौ मूड़ि लियै मूड़े कै बार
मिठुवाय कै नीक-नीक बोलै
कंठी-माला कै जाप करै
दस ढोका नोने के बदले
मउनी भै तीसी तौल लियै
दिन दूनी रात चौगुनी वोकर
लोय लगै दुर्भिच्छी म
यकतनहा नीम कै पेड़ गवाह
बचा बा ‘पाहीमाफी’ मा

एड़ी म् नाहीं फटी बेवाई
कइसै जानैं पीर पराई
वनकै बिगड़य रोज हाज़मा
पेट मोर अगियात बा माई
दुई-दुई दाना खरमिटाई
दाम बटोरैं पाई-पाई
छाती चढ़ि कै काम करावैं
हम नाहीं करिबै हरवाही
उखरि परैं मरि जायं निगोड़े
आग लगै खरिहाने मा
यकतनहा नीम कै पेड़ गवाह
बचा बा ‘पाहीमाफी’ मा

जोरू टोवै गठरी-पोटली
मोर माई मुंह खाली अंतड़ी
पहिले चलिकै कुछ खाय लियौ
बहु नीक बनी सेधरी मछरी
गोहूँ क् बाली गदरान बाय
दुई-चार रोज कै कसर बाय
यक लेहना काटिकै लइ आइब
जुग बीता जांत चुपान बाय
जिउ-जान से दयू अगर राखिन
हम खूब कमाब कटाई मा
यकतनहा नीम कै पेड़ गवाह
बचा बा ‘पाहीमाफी’ मा

भइया पाये मोटकी-मोटकी
हमरे आगे रोटी छोटकी
खाई हम मसल कै दाल-भात
वै दूध पियैं कनखी आंखी
हम सिरिज लियब बा मजेदार
आउर ना मांगब बार-बार
बचिगै थरिया मा तरकारी
दइ दियौ थोर बसियान भात
यक्कै थैली से जनम लिहेन
बेगानी हम दुई आंखी मा
यकतनहा नीम कै पेड़ गवाह
बचा बा ‘पाहीमाफी’ मा

अपने ढर्रे अलहन बीतै
केतनौ आगे रोवै गावै
सूरज डूबे दिन डूबि जाय
भिन्नहीं उगै लइकै आवै
बड़मनई नाहीं काम करैं
कामे कै ना ही दाम दियैं
जाँगर कै काम कमाय अन्न
आपन जाँगर बरबाद करैं
लाठी भांजैं बिन मतलब कै
धरती के बोझ बयारी मा
यकतनहा नीम कै पेड़ गवाह
बचा बा ‘पाहीमाफी’ मा

भूखे पेट कै हँसी निराली
हड्डी टोवैं राम पियारी
झौंसा मुंह दुइ होंठ झुराने
चिपकू गाले दांत चियारी
आंखी मारे बड़े बड़कऊ
ताकिस जइसै वनके वोरी
घर भै चलिकै धान निरावौ
पतरी नीक कमरिया तोरी
टूटै खूब सरापै वोकां
गरियावै मन ही मन मा
यकतनहा नीम कै पेड़ गवाह
बचा बा ‘पाहीमाफी’ मा

अबकी साली करमुन्नन मा
रसियाव कचौड़ी औ’ बरिया
खुब नरमानरम सोहारी-लपसी
देबै मुचौमुच्च थरिया
‘मुंह खोल कै आखत हम मागेंन
रहिगै ना तनिचौ धरम-दया
हाँ-हाँ भरिकै नहकार दिह्‌यू
तोहरे बाती कै कवन थया’
अटका बनिया कै गरज परी
तौ बेंचै माल उधारी मा
यकतनहा नीम कै पेड़ गवाह
बचा बा ‘पाहीमाफी’ मा

सासू तोहरे जब जियत रहीं
बहु मान-मनउवल रखत रहीं
चाउर – पिसान औ’ तरकारी
हार्’हे-गार्’हे दइ दियत रहीं
अरहर-केराव-गोहूँ क् घुघुरी
उप्पर से सिखरन यक लोटा
बेझरी कै रोटी मोट-मोट
देसी घिउ कबहुं-कबहुं पोता
पट्ठा खुब नीक जवान रहेन
लढ़िया ठेली दिन-राती मा
यकतनहा नीम कै पेड़ गवाह
बचा बा ‘पाहीमाफी’ मा

बटुली मा दाल चुरत बाटै
जाइत ब उधार तेल माँगे
ईंन्हन चूल्हा म पझान होये
तनिका घुसुकाय दिहौ आगे
गोहूँ क् रोटी छौंकी दलिया
अरहर कै खाये जुग बीता
अक्तान बहुत अमिल्यान हयौ
धीरज धइकै निधरक बइठा
सैगर बाटै घरभै ताईं
कुलि खाबै नाहिं अकेलै मा
यकतनहा नीम कै पेड़ गवाह
बचा बा ‘पाहीमाफी’ मा.

__आशाराम जागरथ

[जारी….]

पाहीमाफी [१२] : जाति दंस, बड़ा कलंक

आशाराम जागरथ रचित ग्रामगाथा ‘पाहीमाफी’ के  “पहिला भाग” ,  दुसरका भाग  , तिसरका भाग , चौथा भाग , पंचवाँ भाग , ६-वाँ भाग , ७-वाँ भाग , ८-वाँ भाग , ९-वाँ भाग१०-वाँ भाग  , ११-वाँ भाग के सिलसिले मा हाजिर हय आज ई १२-वाँ भाग :

यकतनहा नीम अउर जागरथ

हिन्दी मा पिछले कयिउ सालन से दलित आत्मकथा कय दौरदौरा चलत अहय। ई चलन एतना जोरान अउर फरान कि दलित-लेखन के बहस मा आत्मकथा केंद्र मा आइ गय। खचिन्ना-अस खींच दीन गा कि ऊ दलित-साहित्यकार कउने अरथ मा जेहके लगे आत्मकथै न हुवय। यहिते यह चीज ई भै कि आत्मकथा के नाव पै यक किसिम कय ‘फॊर्म’ कय देखादेखिउ हुवय लागि। यहिमा कौनौ दुइ राय नाहीं न कि इन्हते विमर्स वाले लेखन मा बहुत आसानी भै। मुदा, रचनात्मक इलाका आहिस्ता-आहिस्ता किनरियावा जाय लाग। आशाराम जागरथ कै ई ‘पाहीमाफी’ यहि किनरियाये इलाके कय अनदेखी क लयिके सजगि अहय। जागरथ आत्मकथा के ‘फॊर्म’ कय देखादेखी करय के जगहा पै आपन नवा सिल्प ढूँढ़िन। यहिकय मतलब ई नाहीं कि आत्मकथात्मकता कय भाव छोड़ि दिहिन, बल्कि पकरे अहयँ, उल्टे औरव जरूरी काम किहिन, जौन नहीं कीन जात रहा। पाहीमाफी, भासै नाहीं, अपने सिल्प औ भीतर-बात — दुइनौ के ताईं अहमि अहय। यहि अंक क यहू निगाह से देखि सका जात हय। : संपादक
___________________________________________________

  • जाति दंस, बड़ा कलंक

सूअरबाड़ा, उजड़ी कोठरी
चुप्पे घुसरी ग़ुरबत बुजरी
फुटही खपरी मुंह बाये परी
झिलरी खटिया कथरी-गुदरी
चूल्हा आगे टुटही खांची
खांची मा आमे कै पाती
डुडुवायं बिरावैं माँग खायँ
मंगता-जोगी औ’ सन्यासी
कूकुर-बिलार घर ना झाकैं
मुसरी घुसरैं ना डेहरी मा
यकतनहा नीम कै पेड़ गवाह
बचा बा ‘पाहीमाफी’ मा

दिन-रात खेत मा खटत रहे
वै बड़न कै सेवा करत रहे
वइसै तौ देश अजाद रहा
पर गाँव कै सूद गुलाम रहे
पैलगी दूर से करत रहैं
परछाँह बचायिके चलत रहैं
बाभन-ठाकुर केव आय जाय
खटिया पर से उठि जात रहैं
जे नीक कै कपड़ा पहिर लियै
ऊ खटकै सबकी आँखी मा
यकतनहा नीम कै पेड़ गवाह
बचा बा पाहीमाफी मा

मन ही मन मा सोच विचार
बहुत सहैं वै अत्याचार
सेंत-मेंत मा काम करैं बस
हरवाही पै जियैं चमार
सुख कै तूरि ना पावैं कौर
गाँव से बाहर वनकै ठौर
खाय बिना चाहे मर जांय
केहू न झाँकै वनकी ओर
करै मजूरी गाँव मा केऊ
दिल्ली केऊ बम्बई मा
यकतनहा नीम कै पेड़ गवाह
बचा बा पाहीमाफी मा

उखुड़ी हमार जे तुरअ थै
जानी थै नावं बाय मुँह मा
हम पँहटत हई कऊ दिन से
रंगे हाथे पकरब वनकां
पकरे, ‘हड्डहा’ चमार मिला
खेती-बारी नाहीं वकरे
ऊ बोला काका माफ करौ
झाँवर कै रोग बाय हमरे
कुछ बूढ़ – पुरनियां कहत हये
सोवा गन्ना के खेते मा
यकतनहा नीम कै पेड़ गवाह
बचा बा पाहीमाफी मा

जेकरे खेती वोकरे ऐंड़
खाली बइठ रखावै मेंड़
उखुड़ी छोलै लढ़िया लादै
मजदूरी मा खाली गेंड़
दुई रुपिया औ खरबचाई
दिन भै खोदैं वै बिरवाही
लत्ता-लत्ता लरिके तरसैं
बारहो मास करैं हरवाही
यक दिन जो नागा होय जाय
गारी पावैं सेती मा
यकतनहा नीम कै पेड़ गवाह
बचा बा पाहीमाफी मा

कतहूँ-कतहूँ फुंसी-फोड़ा
मूड़े मा ढीलौ-लीख भरा
करिया धागा गटई पहिरे
तन पे झिलरा चीकट कपड़ा
देहीं मा पाले दाद-खाज
किस्मत का कोसै मुस्कियाय
यक बिगहा मुँह फैलाय लियै
जब खबर-खबर खजुली खजुवाय
माई तू काहे जनम दिहू
ई जात-पात की माटी मा
यकतनहा नीम कै पेड़ गवाह
बचा बा पाहीमाफी मा

सूकन-संती-गोधी-लोकई
औ कुष्ठ रोग पीड़ित तोखई
वै मरा जानवर निकियावैं
गाँवै कै नीबर औ गोगई
ना सीधे मुँह केव बात करै
केव देखतै ही अपमान करै
मेहरारू-बिटियन कै इज्जत
हरदम ही दाँव पे लाग रहै
कामे-काजे काटैं सूअर
तब उड़ै भोज चमरौटी मा
यकतनहा नीम कै पेड़ गवाह
बचा बा पाहीमाफी मा

टुटहा-जस्ता दुइ-यक बरतन
ज्यों साँझ ढलै बाजै खन-खन
जब खाय का घर मा ना आटै
तब खाँय मरा डांगर जबरन
खरिहान कै गोहूँ खाय-खाय कै
बैल जो गोबर करत रहे
वोका बटोरि सुखवाय लियैं
फिर पीट-पाट कै पीस लियैं
दुःख-वीर दलिद्दर दलित रहे
सब खात रहे मजबूरी मा
यकतनहा नीम कै पेड़ गवाह
बचा बा पाहीमाफी मा

परै लाग पेटे मा दाना
समझौ सूदे भये उताना
तनिकौ उज्जर कपड़ा देखैं
बड़े-बड़कवै मारैं ताना
हाल-चाल कुलि ठीकै बाय
बीतै समय जवन कटि जाय
‘घातै घात ‘चमरऊ’ पूछैं
मालिक पड़वा नीके बाय’
सुनेन बेमार रहा हम आयन
दउरा हाली-हाली मा 
यकतनहा  कै पेड़ गवाह
बचा बा ‘पाहीमाफी’ मा

नीक-सूक बेसन कै चिल्ला
खाय न झबरा करिया पिल्ला
घुसा रहै बिस्तर के भीतर
हमरे बहुत लाग बा हिल्ला
नोन-पियाज से रोटी खाई
नाहीं तौ उपास रहि जाई
आगे नाथ न पीछे पगहा
बस पिल्ला के दादा-माई
दूनौ जूनी खाय क् मिलअ थै
बन्दीघर सरकारी मा
यकतनहा नीम कै पेड़ गवाह
बचा बा ‘पाहीमाफी’ मा

हम तौ ठहरेन खेतिहर मजूर
दुसरे सदियन कै छुआछूत
ग़ुरबत मा रोजै गम खाई
तोहरे घर धन-दौलत अकूत
देहीं खुमार मन मा गुबार
अललाय खमोशी चढ़ि कपार
आँखी से टप-टप खून चुवै
ऐ ! कब्जेदारौँ, खबरदार
अपने राही तू मगन रहौ
पीछे मुड़ि देख्यौ ना हमकां
यकतनहा नीम कै पेड़ गवाह
बचा बा पाहीमाफी मा

हीलै ना डोलै रहै गड़ा
जइसन खेते मा ऊढ़ खड़ा
सुध-बुध खोये कुछ उड़ा-उड़ा
ऊ सुवर चरावत रहा खड़ा
अन्नासैं कां गरियाय दिहिन
देखतै चन्दन टीकाधारी
तू हया ढिठान बहुत ‘सरऊ’
मन कहत ब लाठी दइ मारी
कउने वोरी से जाई हम
परछाहीं पूरे राही मा
यकतनहा नीम कै पेड़ गवाह
बचा बा ‘पाहीमाफी’ मा

रसरी जरि गै अइठन ना गै
ना अबह्यूं अकिल ठेकाने भै
भुन-भुनभुन-भुनभुन मन ही मन
बोलै – बतुवाय – सुनै अपूवैं
बउदहा तोर बड़का लरिका
लूला – लंगडा बाटै छोटका
पूरे जवार सन्नाम बाय
बिटिया कां छोड़ि दिहिस मरदा
ई जात-पात औ’ ऊंच-नीच
चाटा लइकै तू घर हीं मा
यकतनहा नीम कै पेड़ गवाह
बचा बा ‘पाहीमाफी’ मा

तू बरा रहौ बरियान रहौ
जाती पै खूब गुमान करौ
मनइन के बीचे हम रहिबै
तू ऊँच रहौ सैतान रहौ
खुब पढ़ौ पुरैहिती घोंट-घोंट
बेटवा हमार बी.ए. मा बा
तू उड़ा रहअ थौ का जानौ
बड़कउना दुबई मा गै बा
उजियारे कै आदी मनई
देखते नाहीं अन्हियारे मा
यकतनहा नीम कै पेड़ गवाह
बचा बा ‘पाहीमाफी’ मा

परै मुरदनी चमरौटी मा
कउनौ फरक न बभनौटी मा
केव न जाय फुकावै साथे
मानौ वै ना हये गाँव मा
आपन काम करैं सब सारा
ताकैं बस, कस लियैं किनारा  
बहुत हुवै तौ बोल दियैं कि 
सीधा-सादा रहा बेचारा
बैर-भाव न किहिस केहू से
जुटा रहै बस कामे मा
यकतनहा नीम कै पेड़ गवाह
बचा बा पाहीमाफी मा

बड़कन मा केऊ मरि जाय
सूद-अछूत  फुकावै जायँ  
लामे खड़ा रहैं चाहे वै
लेकिन मूड़ गिनावै जायँ
यक्कै गाँव मा येतना जात
देस कै काव करी हम बात 
सब कै आपन रीति-रिवाज़
हर जाती मा यक ठू जात
जात-पात मा अइसन जीयैं
जइसै मूस रहैं बिल मा
यकतनहा नीम कै पेड़ गवाह
बचा बा पाहीमाफी मा

गाँव के बाहर बसैं अछूत
कुछ गोरहर कुछ करिया भूत
जइसै तइसै करैं गुजारा
लादे मूड़े बोझ अकूत
कुआँ से पानी भरैं न पावैं
दुसरे गांव से ढोय क लावैं
काम करैं बन मनई-तनई
तब सबकै मनई कहलावैं
जब मागैँ मनई कै दर्जा
गिनती नाहीं मनई मा
यकतनहा नीम कै पेड़ गवाह
बचा बा पाहीमाफी मा

बोले गोगई मन बा खट्टा
पानी कै बा बहुत समिस्या
ईंटा पाथै हम जानिअ थै
कुआँ खोदाइब कच्चा-पक्का
सबकै सब मनसाय गये जब
कुछ भलमनई साथ दिहिन तब
देखतै देखत बनिगै कूआँ
जरवइयन कै चेहरा धूआँ
सबसे खुस मेहरारू – लरिकै
धूम मची चमरौटी मा
यकतनहा नीम कै पेड़ गवाह
बचा बा पाहीमाफी मा.

__आशाराम जागरथ

[जारी….]

पाहीमाफी [११] : भेदभाव गहिर-घाव

आशाराम जागरथ रचित ग्रामगाथा ‘पाहीमाफी’ के  “पहिला भाग” ,  दुसरका भाग  , तिसरका भाग , चौथा भाग , पंचवाँ भाग , ६-वाँ भाग७-वाँ भाग८-वाँ भाग , ९-वाँ भाग, १०-वाँ भाग  के सिलसिले मा हाजिर हय आज ई ११-वाँ भाग :


जौन चीज कवि जागरथ क दूसर अवधी के गाँव के लिखैयन से अलग करत हय, ऊ हय इन कय ‘दिस्टिकोन’। यानी देखय कय नजरिया। प्वाइंट आफ बिउ। यही से, उहै गांवै वाला नजारा, दिस्टिकोन बदलि जाये से अलग नजारा लागय लागत हय। जैसे कोल्हू के लगे कय नजारा देखौ। दलित दिस्टिकोन से अलग सोचय वाला कौनौ लेखक रहत तौ ऊ हुवाँ मह-मह महकत गुलौरी से निकरा गरम गुड़ चुभलावन-रसरंजन करत वाह-वाह करत निकरि आवत। मुला जागरथ अपने अलग नजरिया के कारन हुआँ ‘घूरे चमार’ कय दुख टिकाय देहे अहयँ, जेहका महसूसे के बाद गरम गुड़ कय महकि औ सुवाद दुइनौ असलील लागय लागत हय :  

सोचैं, ठाढ़े घूरे चमार
हमसे अच्छे कूकुर-बिलार
हरवाही करत लड़कपन से
जिनगी रेंगा होय गै हमार!

यक औरौ चीज जागरथ केरी आज की यहि प्रस्तुति मा जहिरानि अहय। ऊका कहत हयँ, ‘पैराडाक्स’ देखाय के सभ्यता कै चीर-फाड़ करब। यहिकय पाखंड उजागर कयि दियब। पैराडाक्स, यानी बिरोधाभास देखाइ के। जैसे जौने कोल्हू पय घूरे चमार का मिनहां कीन जात अहय कि हर्सि न छुयेव, वही जगह बैलवन क कौनौ मनाही नाहीं ना। मनई से जादा पेवर अहयँ बर्ध। इहय समझि आय जौन आज के दिनन मा गौ-रच्छा के नाव पै मनइन क मौति के घाट पहुँचावति अहय। दूसर पैराडाक्स देखौ कि दोस्त के घर गवा ‘अछूत’ दोस्त केसेस बेरावा जात अहय। वहिका बर्तन तक नाहीं नसीब करावा गा खाय के ताईं। भुइयाँ मा खंता खनिके, केरा कय पाता दुनफर्तियाइ के खाइस ऊ। मुला भिनसारे ऊ का देखिस? देखिस कि जौने थरिया का वहसे बेरावा गा, वहिकै बारी कानी कुकुरिया चाटति बाय। मनई कुकुरौ-बिलार से गवा-गुजरा बनाय दीनि गा, इहै जात-परपंच के कारन। ई देखेक बादि, साथी, दुवा-बंदगी कय औपचारिकता भुलाय दियय तौ ठीकय हय। कम से कम ऊ दुवा-बंदगी के पाखंड से अपनेक्‌ बचायिस : 

फिर नजर परी दालानी मा
ऊ आँख फारि कै देखअ थै
कानी कुतिया मल्लही येक
थरिया कै बारी चाटअ थै
ना दुआ-बंदगी केहू से
चुपचाप चला गै चुप्पे मा….

यहि अंक से अब सीधे रूबरू हुवा जाय। : संपादक
_________________________________________________

  • भेदभाव गहिर-घाव 

बोले ठाकुर पीकै दारू
अब चलब-फिरब होय गै भारू
छापी धोती, चप्पल पहिरैं
शूदे-चमार कै मेहरारू
सावां-कोदौ अब अंटकअ थै
मागैं मजूर भरि कै थारी
गोहूँ कै रोटी, दाल-भात
आलू-गोभी कै तरकारी
यक उहौ ज़माना रहा खूब
दिन भर कुलि खटैं बेगारी मा
यकतनहा नीम कै पेड़ गवाह
बचा बा पाहीमाफी मा

जो कहत हयी भोगे बाटी
हम ज़हर कै घूँट पिये बाटी
भुखमरी – गरीबी – छुआछूत
दूनौ आँखी देखे बाटी
यक जनी जाति से ऊँच रहिन
कूँआ से पानी भरत रहिन
हम झम्म से बल्टी डारि दिहेन
वै आपन पानी फैंकि दिहिन
बोलिन, केतनौ पढ़ि-लिखि लेबा
पर अकिल ना आई जिनगी मा
यकतनहा नीम कै पेड़ गवाह
बचा बा ‘पाहीमाफी’ मा

अब आगे मजे कै हाल सुनौ
वनके छपरा मा आगि लाग
हम ह्‌वईं बगलियें खड़ा रहेन
पानी डारैं सब भाग-भाग
देखअ थौ काव तू खड़ा-खड़ा
अगवैं तौ गगरा धरा बाय
झट बोलेन काव करी काकी
हमरे जाती मा छूत बाय
बोलिन वै छूतछात नाहीं
संकट, आफ़त औ’ बीपत मा
यकतनहा नीम कै पेड़ गवाह
बचा बा ‘पाहीमाफी’ मा

मंदिर हरि-कीर्तन होत रहा
औ ढोल मजीरा बजत रहा
हुवयँ बीच थपोड़ी पीट-पीट
गावत मन डूबा मस्त रहा
यक पढ़ा-लिखा नौकरिहा बाभन
दूर से हम्मै देखि लिहिस
गुस्साय कै बोला भाग जाव
औ कान पकरि कै खींच लिहिस
‘अन्हराय गया है सब कै सब
धोबिया बइठा बा बीचे मा’
यकतनहा नीम कै पेड़ गवाह
बचा बा ‘पाहीमाफी’ मा

कुछ अच्छे बाभन साथ रहे
वनके घर आवत-जात रहेन
खटिया के गोड़वारी बइठा
हम गीत-कहानी सुनत रहेन
तोनी पै सरकावत धागा
यक ‘मधुरी बानी’ आइ गये
बइठा देखिन खटिया ऊपर
उलटे ही पाँव वै लउट गये
साथी बोला घर जिन आवा
सबकै सब डांटत हैं हमकां
यकतनहा नीम कै पेड़ गवाह
बचा बा ‘पाहीमाफी’ मा

बजरंग बली कां बचपन मा
परसाद चढ़ायन भेली कै
लइकै घूमी आगे सबके
केऊ ना लियै हथेली पै
पंडित जी बोले रहै दिऔ
तोहरे हाथे मा छूत बाय
दइ देत्या ‘कहरा’ बाँट दियत
ऊ तुहरे जाति से ऊँच बाय
भेली तौ वही, मिठास वही
परसाद बँटा बहु-जाती मा
यकतनहा नीम कै पेड़ गवाह
बचा बा ‘पाहीमाफी’ मा

इस्कूले साथे पढ़त रहे
जाती मा तनिका ऊँच रहे
वनके घर चला गयन यक दिन
देखतै वै खूब निहाल भये
तख्ता पै गद्दा बिछा रहा
मुड़वारी तकिया धरा रहा
दुइ टुटही कुरुसी परी रही
बइठका नीक खुब बना रहा
वल्ले बुढ़ऊ खांसैं खों-खों
रहे मनबढ़ येक जमाने मा
यकतनहा नीम कै पेड़ गवाह
बचा बा ‘पाहीमाफी’ मा

पितरी के लोटा मा पानी
साथी कै बहिनी लइ आई
हम गट-गट पियत रहेन तइसै
डांटै लागीं बड़की माई
लोटा मा अइसन छूत लगा
घर-भीतर हाहाकार मचा
मितऊ कै महतारी बोलिन
हमरे कामे कै ना लोटा
लइ जा बेटवा! तू घर लइ जा
धइ ल्या तू अपने झोरा मा
यकतनहा नीम कै पेड़ गवाह
बचा बा ‘पाहीमाफी’ मा

कसि कै दाँते काटी रोटी
दुई छूत – अछूत रहे साथी
हे नीम! छाँह मा तोहरे हम
खीसा सच बइठ सुने बाटी
‘छुतऊ’ कै बैल तुराय गवा
साथे – साथे हेरै निकरे
हेरत – हेरत संझा होय गय
घर लौटे बैल दुवौ पकरे
साथी बोला कि रुकि जात्या
कहवाँ जाब्या अब राती मा
यकतनहा नीम कै पेड़ गवाह
बचा बा पाहीमाफी मा

राती जब खाना खाय क् भवा
यक बड़ा अड़ंगा बाझि गवा
टुटहा ज़स्ता वाला बरतन
पिछवारे कहूँ लुकाय गवा
घर-मलकिन बोलीं काव करी
बनये हम हई दाल – रोटी
उप्पर से दलियौ पातर बा
केरा कै पाता ना रोकी
हम कहत रहेन कि जाय दिया
तोहरे सब रोकि लिह्या वोकां
यकतनहा नीम कै पेड़ गवाह
बचा बा पाहीमाफी मा

चुप रहौ कतौ ना करौ फ़िकर
अब्बै जुगाड़ कुछ करिबै हम
बोले बुढ़ऊ बाबा अहीर
बुद्धी मा अबहूँ बा दमख़म
फंड़ियाय कै धोती खटिया से
उतरे लइकै लमका खुरपा
तनिका वहरी से पकरि लियौ
घुसकाइब हम छोटका तख्ता
खोदिन यक बित्ता गड्ढा वै
मड़हा के कोने भूईं मा
यकतनहा नीम कै पेड़ गवाह
बचा बा पाहीमाफी मा

केरा कै पाता दोहरियाय
गड्ढा मा हलके से दबाय
तइयार अजूबा भै बरतन
बोले अब मजे से लियौ खाय
ऊ रहा भुखान सवेरे कै
कुछ भुनभुनाय आवाज़ किहिस
इज्ज़त – बेलज्ज़त भूलि गवा
मूड़ी नवाय कै खाय लिहिस
साथी बोला बाहर निकरा
ल्या पानी पिया अँजूरी मा
यकतनहा नीम कै पेड़ गवाह
बचा बा पाहीमाफी मा

भिनसारे उठि कै चलै लाग
भैंसिया बहुत अफनात रही
पितरी के बड़े ‘पराते’ मा
बसियान खाब ऊ खात रही
फिर नजर परी दालानी मा
ऊ आँख फारि कै देखअ थै
कानी कुतिया मल्लही येक
थरिया कै बारी चाटअ थै
ना दुआ-बंदगी केहू से
चुपचाप चला गै चुप्पे मा
यकतनहा नीम कै पेड़ गवाह
बचा बा पाहीमाफी मा

कातिक-अगहन हँसै सिवान
जोतै हर केव काटै धान
चिखुरी चिखुरैं, छोलैं घास
केउ खेते मा फेकै खाद
चटक चाँदनी, आधी रात
गूला भीतर दहकै आग
दूर-दूर तक गम-गम गमकै
खौलै रस जब, फूलै पाग
आलू-सेम कै सुन्दर माला
पाकै टंगा कड़ाहे मा
यकतनहा नीम कै पेड़ गवाह
बचा बा पाहीमाफी मा

कोल्हू कै बैल कोल्हारे मा
उखुड़ी पेरैं टुक-टुक ताकैं
सुरती दाबे घूरे चमार
पाछे-पाछे कोल्हू हाकैं
वनकै लरिका ओढ़े चादर
पलथी मारे उखुड़ी दाबै
बइठे- बइठे औंघांय जाय
जे देखि लियै कसि कै डाँटै
लरिकन कै टोली मड़िरियाय
पहिला परसाद मिली सबकां
यकतनहा नीम कै पेड़ गवाह
बचा बा पाहीमाफी मा

झुलनी झमकावत आय परीं
गोरहरकौ दुलहिन बखरी कै
बोलिन घूंघुट आधा काढ़े
ताजा रस चाही उखुड़ी कै
लरिका कां तनी उठाय दियौ
हम लियब चुहाय खुदै काका!
रस रोपत हई दूर होय जा
दूरै से बैलन कां हांका
भूले से छुया न हर्स – बैल
जब तक रस भरै न बल्टी मा
यकतनहा नीम कै पेड़ गवाह
बचा बा पाहीमाफी मा

सोचैं, ठाढ़े घूरे चमार
हमसे अच्छे कूकुर-बिलार
हरवाही करत लड़कपन से
जिनगी रेंगा होय गै हमार
उखुड़ी पेरे से रस निकरै
खोहिया भी कामे आवअ थै
हम जाँगर पेरी रोज़-रोज़
तबहूँ सब छूत मनवाअ थै
ई बैला हमसे नीक बाय
ना सोच-विचार रखै मन मा
यकतनहा नीम कै पेड़ गवाह
बचा बा पाहीमाफी मा.

__आशाराम जागरथ

[जारी….]

पाहीमाफी [१०] : सधुवाइन कै परबचन

आशाराम जागरथ रचित ग्रामगाथा ‘पाहीमाफी’ के  “पहिला भाग” ,  दुसरका भाग  , तिसरका भाग , चौथा भाग , पंचवाँ भाग , ६-वाँ भाग७-वाँ भाग८-वाँ भाग , ९-वाँ भाग के सिलसिले मा हाजिर हय आज ई १०-वाँ भाग :

jagrath

धरम संस्था कय चीर-फाड़ पाहीमाफी मा हुअत जाति अहय। रचनाकार का बहुत नगीचे से धरम कय भरम समझय कय मौका मिला। वहिका परतख परमान मिला, जैसे कि भाग नौ मा, और वहिका अइसेव लोग मिले जे धरम-भरम का बेपर्द कय दिययँ। जैसे यहि अंक कय सधुवाइन। यइ अहीं तौ सधुवाइन लेकिन बड़ा नजदीकी तजुरबा बतावति अहयँ। समाज मा औरतन के ताईं सब धरमन कय बिउहार यक्कै नाईं अहय। औरत कय सोसन अउर मर्दवाद का मजबूत करब। वैसे तौ ई कमै भा अहय, मुला जहाँ भा अहय हुवाँ अच्छे से देखा जाय सकत हय। काव? इहय कि जब औरतय धरम के घन-चक्कर कय बखिया उधेड़त हयँ तौ ऊ बहुत फुर-वादी रहत हय। हियाँ कय सधुवाइन नास्तिक नाहीं अहयँ, मुला मनई मा औ’ भरमित भगवान-गिरी कय बिरोधी अहयँ : 

नकली मेर-मेर भगवान
वन्हैं मानैं सब नादान
बहुत दूर तक बहुत देर तक
उप्पर देखौ जाबौ जान….

वनकै भगवान क लयिके आपन दरसन अहय। दुनिया के बिराट मा वइ भगवान देखत हयँ। दुकानदारी मा तौ हरगिज नाहीं। आपन बुद्धी सबसे सजग साथी होइ सकत हय। बुद्धी न लगायी जाये तौ कहूँ न कहूँ फँसय क परे। अप्प दीपो भव — कय स्वर हियाँ देखा जाय सकत हय : 

सोचौ-समझौ खुदै विचारौ
दीया बारौ बुद्धी मा….

अंतिम बात ई कि अब पाहीमाफी पखवारी क्रम के बजाय, महिनवारी क्रम से पेस कीन जाये। फिलहाल आज ई दसवाँ भाग पढ़ा जाय औ अपने राय से अवगत करावा जाय। : संपादक 
________________________________________________________

  • सधुवाइन कै परबचन

टोलिया मा आइन साधुवाइन
आपन बीती कुलि बतलाइन
बइठाय मरद-मेहरारू कां
कल्ले-कल्ले खुब समझाइन
टेढ़ी कुबरी हाथे पकरे
मरदाना पहिरावा पहिरे
लटकाये झोरा कान्हें पै
मचिया ऊपर बइठिन बहिरे 
माथे चन्दन, मूड़े साफा
चटपटिया पहिरे गोड़े मा 
यकतनहा नीम कै पेड़ गवाह
बचा बा ‘पाहीमाफी’ मा

यकदम्मै उमर रही बारी
गवने मा आयन ससुरारी
घूंघुट निकारि करियाय उठेन
जइसै बछिया बान्हीं घारी
यक सांड़ महा कै खुदिहारै
सीन्हीं से वार करै हमपै
हम तूरि-तारि खूंटा-पगहा
राती मा भागि लिहेन जुरतै
भागत-बिड़रत कउनौ खानी
घर पहुँचेन होत भोरहरी मा
यकतनहा नीम कै पेड़ गवाह
बचा बा ‘पाहीमाफी’ मा

भौचक देखयँ सब नात-बांत
दादा कै पारा आसमान
तू नाक कटाय दिहू बिटिया!
महतारिउ कै निकरै परान
खपरी कै पेनी, गलफुलनी
हेढ़ना यस पेट लिहे बाट्यू
नोखे मा यक ठू तुहीं हयू
जो  ससुरे-घर नाहीं जाब्यू!
जा! उल्टे गोड़े लउट जाव
नइहर की वोरी झांक्यू ना
यकतनहा नीम कै पेड़ गवाह
बचा बा ‘पाहीमाफी’ मा

पकरे जंजीर दरवज्जा कै
चौखट ठाढ़े रोवैं माई
दादा से बोलिन रहै दियौ
जो बदा होई भोगा जाई
सोचत-सोचत पगलाय गयन
हम गयन बहाने से बहिरे
चल दिहेन अजोध्या कां सीधै
बांसे कै कइन हाथ पकरे
मन कहै बूड़ जाई समाय
सरजू माई के गोदी मा
यकतनहा नीम कै पेड़ गवाह
बचा बा ‘पाहीमाफी’ मा

लागै दुनिया गै उलट-पलट
बत्ती दिमाग कै जलै-बुझै
काने बाजै तक-ताक-धिना
यक बड़ा बवंडर नाच करै
यतने मा देखेन यक कुतिया
निहचिन्ते टहरत जात रही
कुकुरै आपस मा लड़यँ- भिड़यँ
ऊ दूर बइठ कुंकुवात रही
मानौ हम रस्ता पाय गयन
जीयै कां ठान लिहेन मन मा 
यकतनहा नीम कै पेड़ गवाह
बचा बा ‘पाहीमाफी’ मा

हम बदल-बदल मंदिर बदलेन
औ’ बदल दिहेन हाथे क् लकीर
सुख मिला बहुत खायन-पियन
हट्ठी – कट्टी होय गै सरीर
भगवान कै सेवा खूब किहेन
आगे कै गाथा ना गाइब
अन्दरखाने कै हाल-चाल
तोहरी सबकां ना बतलाइब
ई धरम-जाल सब भरम हुवै
कुच्छौ नाहीं बा भक्ती मा
यकतनहा नीम कै पेड़ गवाह
बचा बा ‘पाहीमाफी’ मा

बिन आग रहे ना उठय धुवाँ
हम पानी पीयन कुआँ-कुआँ
खुब अंधा-धुंध दरबार सजा
सब गधै पँजीरी खायँ हुवां
कल्ले-कल्ले कुलि जानि गयन
हमहूँ तब खेल करै लागेन
जे बहुत बनत रहे वनकां
ऊँगरी पै टहरावै लागेन
हम जवन-जवन देखे बाटी
नाचत बाटै कुलि आंखी मा
यकतनहा नीम कै पेड़ गवाह
बचा बा ‘पाहीमाफी’ मा

परिसरमी केऊ बिना सरम
पेटे ताईं कुलि मेर करम
मूड़े कै बार सुफेद भवा
गिरहस्ती सबसे बड़ा धरम
जनता बाटै भोली-भाली
बछिया छुवाय पंडय लूटैं
मंदिर ना चढ़य चढ़ावा तौ
बड़के महंत सबकां डाटैं  
अपुवां ना पूजा-पाठ करैं
बस नाधे रहैं पुजारी कां
यकतनहा नीम कै पेड़ गवाह
बचा बा ‘पाहीमाफी’ मा

ओखरी मा चाउर कूटा जाय
सूद – गरीबा लूटा जाय
भूसी – पइया हिगरि जाअ थै
मूरख बाभन पूजा जाय
जइसै करखाना कै मालिक
वइसै लागैं मंदिर-महंत
धइ लिइयं हलोरि चढ़ावा कुलि
बरहोमासा वनकै बसंत
कुछ चेला-चापर खटैं बहुत
दुइ जूनी खाय के बदले मा
यकतनहा नीम कै पेड़ गवाह
बचा बा ‘पाहीमाफी’ मा

भगवान अगर मनई होते
मनई तब मनई ना होते
दुनिया-जहान कुछ ना होतै
जौ रूप-गंध वाले होते
निर्जीव नियामक निर्विकार
ना भाव-भावना कै आदी
वनके पाछे जे भागअ थै
ऊ करै समय कै बरबादी 
भगवान तौ ई ब्रह्माण्ड हुवै
सूरज – चंदा – तारै जेहिमां
यकतनहा नीम कै पेड़ गवाह
बचा बा ‘पाहीमाफी’ मा

नकली मेर-मेर भगवान
वन्हैं मानैं सब नादान
बहुत दूर तक बहुत देर तक
उप्पर देखौ जाबौ जान
धरम-करम पाखण्ड न होतै
तब्बौ ई ब्रह्माण्ड तो होतै
नकली मर वोराय सब जाते
तब मरहम कै दरसन होतै
पाप-पुन्न सब यक्कै भाव
बाटै वनके लेखे मा
यकतनहा नीम कै पेड़ गवाह
बचा बा ‘पाहीमाफी’ मा

सृष्टि-चक्र के सुन्दर जोड़ी !
भागौ ना भगवान की वोरी
मनमाफिक मौसम मा अपुवैं
पइदा हूवैं लिल्ली – घोड़ी
दुसरे के ना रह्यौ भरोसे
मिल-जुल कै निपटाओ काज
आपन जांगर प्यार-मोहब्बत
आपन सबसे बड़ा समाज
सोचौ-समझौ खुदै विचारौ
दीया बारौ बुद्धी मा
यकतनहा नीम कै पेड़ गवाह
बचा बा ‘पाहीमाफी’ मा.

__आशाराम जागरथ

[जारी….]

पाहीमाफी [९] : उलौहल-कनफुसौवल

आशाराम जागरथ रचित ग्रामगाथा ‘पाहीमाफी’ के  “पहिला भाग” ,  “दुसरका भाग”  , तिसरका भाग , चौथा भाग , पंचवाँ भाग , ६-वाँ भाग७-वाँ भाग८-वाँ भाग के सिलसिले मा हाजिर हय आज ई ९-वाँ भाग :   17439871_399423837084206_1780308018_n

अछूते अहसासन क समाउब पाहीमाफी-कार कय खूबी हय। धरम-परपंच, बिरादराना अहंकार, सासन-सत्ता कय नाकामी जईस बातन कय चर्चा तौ आये दिन होतिन रहत हय मुला संवेदना के धरातल पै नये अहसासन से  यहिकय मर्म रखय कय काम खासी चुनौती से भरा अहय। ई चुनौती जागरथ स्वीकार करत हयँ। हियाँ इन बिसयन पै जौने प्रसंगन कय चर्चा कीन गय अहय; वय केहू गाँव के रहवैया कय सच होइ सकत हयँ। यहि प्रस्तुति के स्टैंजन क पढ़त के कयिउ चेहरै आप केरी आंखी के तरे से गुजरि जैहैँ। कयिउ चपरहन कय नाव याद आवय लागे। यहि बिन्यास मा ई सब आउब अवध सहित समूच्चै भारत कय संवेदना क झकझोरब आय। ढेर का कहा जाय, आप सीधे कविता से रूबरू हुआ जाय। : संपादक

________________________________________________________

  • उलौहल-कनफुसौवल

तू वनके साथे खड़ी रह्यू
हँसि-हँसि काहे बतियात रह्यू
बोलिस, बड़कऊ तू चला जाव
नाहीं पइबा मुँह भरि कै तू
घूमौ तू  बाग़-बगीचे  मा
मुँह देख लिहौ तनि सीसे मा
जो करत हया ऊ करत रहौ
बोल्यो  जिन हमरे बीचे मा
सब जानअ थै तू काव हया
हल्ला बा देश-जवारी मा
यकतनहा नीम कै पेड़ गवाह
बचा बा पाहीमाफी मा

‘भागौ तू बहिनी नीक हयू
हमरे बारे मा बात कह्यू !’
वोरहन लइकै ‘उतरहा’ गयिन
काहे तू अइसन कहत रह्यू ?
‘नाहीं कुछ बोलेन मान जाव
तुहुँसे ना कउनौ बैर-भाव’
तब कहिन कि गंगा जल लइकै
बड़के बेटवा कै कसम खाव
बोलिस ‘पहिले वन्हैं लावा जे
आग लगाइस बीचे मा’
यकतनहा नीम कै पेड़ गवाह
बचा बा पाहीमाफी मा

हम कहत हई कि झूठ हुवै
हमारौ भी कहा मान जात्यू
सतुवा-पिसान लइकै हमरे
पीछे तू बहुत परी बाट्यू
यक्कै बेटवा हमरे बाटै
वोकर किरिया हम ना खाबै
वनकां हम ढंग से जानिअ थै
जे कान तोहार भरत बाटै
अल्गट्टे मिल्यू तो बतलायिब
जिन आयू वनके बाती मा
यकतनहा नीम कै पेड़ गवाह
बचा बा पाहीमाफी मा

अब काव कही मन हुलरत बा
बतिया पेटवा मा पचत न बा
बइठब ना बहिनी जाय दियौ
बटुली मा अदहन खौलत बा
काने मा कइकै खुसुर-पुसुर
वै हुवां से जल्दी भाग लिहिन
ठोकैं माई माथा आपन
सुनतै ही खड़े झुराय गइन
यक बिटिया रही कुँवारी लेकिन
लरिका वोकरे पेटे मा
यक तनहा नीम कै पेड़ गवाह
बचा बा पाहीमाफी मा

भूले नहीं भुलाये जात
काली थान्हें वाली बात
जहाँ पे राही सीस झुकावैं
लोगै जल कै धार चढ़ावैं
चढ़ै कड़ाही पूड़ी-लपसी
लोगै जाय मनौती मानैं
लाल लँगोटी चन्दन धारी
गाँवै कै यक सुन्दर नारी
दूनौ जन माई के कोठरी
राती के अन्हियारी मा
यकतनहा नीम कै पेड़ गवाह
बचा बा पाहीमाफी मा

हल्ला होय गय कानो-कान
लोगै बोलैं दबी जुबान
पकरि गयीं वै रंगे हाथन
काव करैं जब रहीं जवान
महादेव कां धार चढ़ावैं
धरम-करम कै पाठ पढ़ावैं
भीतर पाकै खूब गुलगुला
बाहर छूआछूत मनावैं
के मनई बान्ही कुदरत कां
जात – पात के रसरी मा
यकतनहा नीम कै पेड़ गवाह
बचा बा पाहीमाफी मा

बहिनी ! अब तुहुंसे काव कही
यक बात सुनेन अपने काने
हरवाहे साथे भागि रहीं
बइठाई बाटीं वै थाने
घर तरी-तापड़ी, नगद धरा
लइ भागा, हाथ सफा कइगै
उप्पर से नमक हराम चपरहा
पाँव बहुत भारी कइगै
अब होई काव दयू जानै
भै काम बुरा नादानी मा
यकतनहा नीम कै पेड़ गवाह
बचा बा ‘पाहीमाफी’ मा

ऊ सुवर चरावै आय रही
पेड़े के तरे छहाँत रही
लहचोरा, पिपरे कै गोदा
चटकारा दइकै खात रही
यक बड़ा-बड़कवा आय गये
सन्हें से सनकारै लागै
जब बात सुनिस नाहीं वनकै
छपकी लइकै मारै लागे
बोले तू हियाँ से भाग जाव
फिर गोड़ धरिव न खेते मा
यकतनहा नीम कै पेड़ गवाह
बचा बा ‘पाहीमाफी’ मा

बतिया मन-भीतर धरे रही
बस खाली मौका तड़त रही
रोवाँ केवांच कै पुड़िया मा
धोती-कोने गठियाये रही
ऊ रहा, चपरहा जात रहा
मुँह-दाबे पान चबात रहा
कपड़ा निकारि जुट्टा उप्पर
ताले मा खूब नहात रहा
चल दिहिस पहिरि उज्जर कपड़ा
खजुवाय लाग कुछ देहीं मा
यकतनहा नीम कै पेड़ गवाह
बचा बा ‘पाहीमाफी’ मा

यक जने बहुत उधिरान रहे
परिसहिजै खेत चराय लियैं
लुलिउ-लंगड़ी कां ना छोडै
वै छेड़ दियैं, गरियाय दियैं
बउदही, कलूटी, मति-मारी
गन्धाय उमर यकदम बारी
चितपावन पंडित जी अधेड़
भुखमरी म पाँव किहिन भारी
तब्बौ सब वनकै गोड़ छुवैं
वै कथा सुनावैं घर-घर मा
यकतनहा नीम कै पेड़ गवाह
बचा बा पाहीमाफी मा.

__आशाराम जागरथ

[जारी….]

पाहीमाफी [८] : बियाह-गवन, गीत-गवनई

आशाराम जागरथ रचित ग्रामगाथा ‘पाहीमाफी’ के  “पहिला भाग” ,  “दुसरका भाग”  , तिसरका भाग , चौथा भाग , पंचवाँ भाग , ६-वाँ भाग७-वाँ भागके सिलसिले मा हाजिर हय आज ई ८-वाँ भाग :

17629620_406705899689333_5883690349055505160_n

अनायासपन क पहीमाफी कय खासियत समझौ। कौनौ जबरी कय बौद्धिक कसरत न तौ कवि अपने वारी से करे अहय न दुसरे पढ़ैयन से यहि कय माँग करत हय। सादगी मा जागरथ कमाल करत हयँ। कवितन से गुजरत के लागत हय, जे गाँव से अहय वहिका ढेर, कि अरे वाह, ई सब तौ होतय रहा, देखव हम केतना भुलाइ ग अहन। यादन   कय बिजुरी जहाँ-तहाँ चमकय लागत हय। पढ़त के हम हुवयँ पहुँचि जाइत हय जहाँ कय बाति औ बरनन कीन जात हय। मजेदार बाति ई अहय कि जागरथ कविता मा तमाम चीजन कय नाव भर नाहीं गिनौते, ओन का रखय मा कविताई कय छीज-बट्टा हुवय से बचायेउ रहत हयँ। चीजन कय जिक्र, नउनौ, उबियावत नाहीं बल्कि अपने साथे ‘कविताई कय कुतूहल’ लिहे पढ़ैया कय चित्त लोभाय लियत हय। जइसे, फोंफी कय जिक्र वै अस करत हयँ कि कयिउ फोंफी वाले चेहरय आपके निगाही मा नाचि जायँ। फूलगोभी से वहिकय उपमा केतनी नयी अहय :

सोने कै बड़ी- बड़ी फोंफी
जैसन डड़ियाय फूल गोभी

उपमा तौ उपमा, डड़ियाब – क्रियौ आपन ब्यंजक असर छोड़त हय! : संपादक
_______________________________________________________

  • बियाह-गवन, गीत-गवनई

हमरे घर मा परा बियाह
चहल-पहल औ’ खुसी-उछाह
नात-बाँत औ जात बिरादर
गावैं थरिया-सूप बजाय
घर मा मेहरारुन कै भीर
गावैं लचारी धोबिया गीत
चमकै सेनुर, टिकुली माथे
कमर मा करधन नाके कील
मिल-जुल कै सब रोटी पोवैं
गारी गावैं आड़े मा
यकतनहा नीम कै पेड़ गवाह
बचा बा पाहीमाफी मा

कड़ा-छड़ा गोड़े मा लच्छा
काने तरकी लागै अच्छा
केहू के होठे झुलनी झूलै
करियहियाँ चाँदी कै गुच्छा
सोने कै बड़ी- बड़ी फोंफी
जैसन डड़ियाय फूल गोभी
हाथे मा टड़िया गले हवेल
गुलुबन्द–मुनरी औ पहुँची
हँसुली-बिछिया अउर पछेला
पहिरैं कामे काजे मा
यकतनहा नीम कै पेड़ गवाह
बचा बा पाहीमाफी मा

बड़के घर मा परा बियाह
बदला मालिक कै व्यवहार
लगा रहैं सब मनई-तनई
बाहर-भीतर नाऊ-कहार
मीठ-मीठ बोलैं बतियावैं
हरवाहे कां काम बतावैं
कबहुं-कबहुं झक्काय जायँ तौ
बड़के बेटवा कां गरियावैं
ई ससुरा अब नाक कटाई
घुसा रहअ थै चूल्ही मा
यकतनहा नीम कै पेड़ गवाह
बचा बा पाहीमाफी मा

वनके शादी म बहुतै खरचा
जबकि बेगार करैं परजा
घर से लइकै जनवासे तक
वै साफ करैं लइकै कुचरा
बस खाय के बदले काम करैं
अपने घर काम अकाज करैं
काटैं लकड़ी, चीरैं चइला
नाची ताँईं ढोवैं तखता
चाहे अपुवां भुइयैं सोवैं
खटिया दइ दियैं बराती कां
यकतनहा नीम कै पेड़ गवाह
बचा बा पाहीमाफी मा

तेलवानी भतवानी बाद
आय वियाहे दिन बारात
हाथी चढ़ि कै दुलहा आय
लइकै साथ पतुरिया नाच
पहिले भवा दुवारे क चार
गायिन समधिन घूँघुट काढ़ि
गाँव कै बिटियै औ मेहरारू
मारैं मिलि बीरा दुइ-चार
परि गै झीन भरे कय जौ
सहिबाला के आँखी मा
यकतनहा नीम कै पेड़ गवाह
बचा बा पाहीमाफी मा

होत वियाह भवा भिनसार
बड़हारे दिन शिष्टाचार
परिचय पावैं दूनौ पच्छै
जनवासे मा करैं विचार
कुआँ पड़ा केवड़ा-जल महकै
अतर कै खुशबू गम-गम गमकै
मिसिरी, पान, गरी कै गोला
बाटैं मेवा थोड़ा-थोड़ा
हमहूँ टुकुर-टुकुर सब देखी
बइठा यकदम कोने मा
यकतनहा नीम कै पेड़ गवाह
बचा बा पाहीमाफी मा

बहुत बाय खजुवात गदोरी
पंडित बाबा दियौ मजूरी
हमहूँ अपने घर कां जाई
ना करवावा बहुत चिरौरी
बड़की बिटिया क गवन ठना बा
घर मा यक्कौ दाना न बा
मिट्टी मा इज्ज़त मिलि जाई
तोहरे दया से जवन बना बा
पाँच जने कुलि अइहैं आनैं
पठइब यक ठू धोती मा
यकतनहा नीम कै पेड़ गवाह
बचा बा पाहीमाफी मा

दौरा-दौरा बड़कना आय
बोला कि गयन रहा घासी
बम्बई से मौसा आवत हैं
साथे मा मौसी भी बाटीं
बक्सा मूड़े लादे-लादे
केव आउर बा वनके साथे
चमकौवा कपड़ा लाल-लाल
पहिरे मुनिया बइठी कांधे
घर जल्दी चला बोलाइन हैं
दीदी भेजे बाटीं हमकां
यकतनहा नीम कै पेड़ गवाह
बचा बा पाहीमाफी मा

बहुतै कम उमर हमार बाय
दादा के सिर पै बोझ बाय
गवने कै चीज जुहान बाय
गोड़े मा चप्पल नाहीं बा
यक तौ डर ऊपर से शरम
हम कहिबै वै ज़रूर डटिहैं
काकी तू कहि द्या दादा से
नीकै-बेकार खरीद लइहैं
माई हमरे ज़िंदा होतीं
ई दिन ना होतै झंखै कां
यकतनहा नीम कै पेड़ गवाह
बचा बा पाहीमाफी मा

लोक-नृत्य चाहे संगीत
सूद-चमार , निभावैं रीत
अहिरौवा-चमरौवा नाच
धोबी गावैं धोबिया गीत
राम बकस साथिन के साथ
नाचैं खूब कहरवा नाच
डुग-डुग-डुग-डुग हुड़का बोलै
झन-झनाझन बाजै झांझ
कउनौ लोक-कला ना देखा
बाभन-ठाकुर-बनिया मा
यकतनहा नीम कै पेड़ गवाह
बचा बा पाहीमाफी मा

धनरोपनी, निरवाई गीत
‘जंतसारा’ जाँता-संगीत
मेर- मेर कय होय गवनई
जइसन मौसम, वइसन रीत
‘मल्लहिया’ मल्लाहे गावैं
गंगा-गीत कै राग सुनावैं
गावैं झूमि चमार ‘चनैनी’
‘नौवा- झक्कड़’ नाऊ गावैं

‘बंजरवा’ औ तान ‘नयकवा’
तेली टेरैं रागी मा
यकतनहा नीम कै पेड़ गवाह
बचा बा पाहीमाफी मा

__आशाराम जागरथ

[जारी….]

पाहीमाफी [७] : परदेसी कै चिट्ठी-पाती

आशाराम जागरथ रचित ग्रामगाथा ‘पाहीमाफी’ के  “पहिला भाग” ,  “दुसरका भाग”  , तिसरका भाग , चौथा भाग , पंचवाँ भाग , ६-वाँ भाग , के सिलसिले मा हाजिर हय आज ई ७-वाँ भाग:

‘पाहीमाफी’ अब काफी उठान पै आइगा बाय। जे रचना से लगातार जुड़ा होइहैँ ते जानत होइहैं कि जौन हियाँ अहै ऊ अन्तै नाहीं। कयिउ उत्साह बढ़ावै वाली टिप्पनिउ मिलति अहयँ। आज हम ऐसनै यक टीप का हियाँ रखित अही, जेहिमा पाहीमाफी के रचनात्मक खूबी का हिगारा गा अहय:
capture-20170319-125648         “बहुतै गंभीर विवेचना क माँग करत है आशाराम जागरथ जी कै इ छोटी सी कविता। ई बतावत है कि ऊँच-नीच, भेद-भाव अउर छुआछूत के जवन धारा हमरे सब के निजी जीवन औ संस्कृति के करिखा अउर जहरीली कीचड़ से बोरत हजारन साल से बहत जात बा, ओकर अंत करै के समय नजदीक आवत बा। एतना गनीमत रहे प्रकृति के कि जेकरे कपड़ा-लत्ता , घर-दुआर के बोरत ई गंदगी के धारा बहावे क जतन किहा गा ओकर कपड़ा गंदा होइ गा मुदा ओकर हृदय बिलकुल साफ सोना एस रहि गा, अउर जे आपन कपड़ा साफ चमाचम राखे खातिर गंदगी दुसरे के तरफ बहाएस ओकर हृदय गंदगी अवर बदबू के घर होइ गा। पाहीमाफी के ई सब कविता कुसुम ओही कीचड़ आ गंदगी के दर्द के बयान हौ। अउर एहि बात के सबूत हौ कि कल जब नये भारत के निर्माण में एही कीचड़ वाले हाथ जुटिहैं तो जौने कुसुम के सुगंध से दिशा दिशा महकी ऊ गंध अब से पहले केहू के नसीब ना रही। जागरथ जी के बहुत बहुत बधाई कि आपन गांव अउर गांव के खुशबू अपने भीतर जिआये हएन।” (टीप-कार : ओमप्रकाश मिश्र

आज जवन अंक हियाँ रखा जात अहय वहिमा रचनाकार अपने चिट्ठी-लिखायी कय अनुभव बाँटे अहय। चिट्ठी के माध्यम से भीतरखाने कय ऊ सच आवा अहय जेहका बहुत कमै देखा गा अहय। रचनाकार कय निजी अनुभव हुवय के कारन बात बहुत पते पै बैठत चली गय हय। ई समझौ कि चिट्ठी लिखी गय है आपके दिलो-दिमाग मा सनेस पहुँचेक्‌ ताईं। : संपादक 
_______________________________________________________

  • परदेसी कै चिट्ठी-पाती

काहे गुलरी कै फूल भया
लागत बा रस्ता भूलि गया
बहुतै दिन बाद भेटान्या है
का हो काका ! तू भले हया
बोले, कुलि हाल ठीक बाटै
बचि गयन बेमारी से ज़िंदा
अपने घर सुखी हईं बिटियै
यकठू बेटवा कै बा चिंता
सोचिअ थै अबकी पठय देई
कुछ जाय कमाय बम्बई मा
यकतनहा नीम कै पेड़ गवाह
बचा बा पाहीमाफी मा

परदेसी परदेस कमायं
लौटैं गाँव बघारैं सान
लाल अँगोछा मूड़े बान्हें
लिहें रेडियो अइठें कान
नई साइकिल, लाल रुमाल
दांत मा सोना, मुँह मा पान 
बम्बहिया लाठी कान्हें पै
विरहा गावैं टेरे तान
तहमद-बंडी पहिर कै घूमैं
चमकै घड़ी कलाई मा
यकतनहा नीम कै पेड़ गवाह
बचा बा पाहीमाफी मा

कच्छा तीनै मा पढ़त रहेन
कागज़–पाती सब बचवावैं
पाई न पकरि कलम ढंग से
तब्बौ सब चिट्ठी लिखिवावैं
मुल काव करैं वनहीं सबहीं
पढ़वइया गाँव मा कमै रहे
जे रहा तनी बड़वरकन मा
छोटवरकै जात डेरात रहे
घर आवैं मेल-मेल मनई
भिनसारे–संझा–राती मा
यकतनहा नीम कै पेड़ गवाह
बचा बा ‘पाहीमाफी’ मा

खत लिखा सिरी उपमा जोगे
कि हियाँ पै सब कुछ कुसल बाय
ईस्सर से नेक मनाई थै
वंहकै नीकै उम्मीद बाय
आगे कै हो मालूम हाल
कातिक मा करिया जात हये
वनके हाथे कुछ सर-समान
पइसा–कौड़ी बाटी पठये
पंहुचिहैं तौ जाय कै लइ आयू
वकरे ना रह्यू भरोसे मा
यकतनहा नीम कै पेड़ गवाह
बचा बा ‘पाहीमाफी’ मा

करिया-करिया धगरिन काकी
पहुँचीं लइकै यक पोसकाड
बेटवा कमात बा डिल्ली मा
थोरै मा लिखि द्‌या हाल-चाल
बिचकावत मुंह वै देखि लिहिन 
बोलिन अच्छा हम जाई थै
तू पढ़ा–लिखा बाट्या बचवा !
तब्बै चिट्ठी लिखिवाई थै
हम कहेन बिहान इतवार हुवै
निस्चिंते आयू छुट्टी मा
यकतनहा नीम कै पेड़ गवाह
बचा बा ‘पाहीमाफी’ मा

चिट्ठी लिखवावै यस बइठिन
झौवा भै गऊवाई गावैं
आंसू पै आंसू बहा जाय
बोलत–बोलत रोवै लागैं
“हाँड़ी–गगरी ठन-ठन गोपाल
अपुवां कामे नाहीं जाते
पंडित कै लरिका मारे बा
घर हीं लंगड़ात चलत बाटे
कुछ पइसा जल्दी भेजि दिहा
यक्कै धोती बा देहीं मा
यकतनहा नीम कै पेड़ गवाह
बचा बा ‘पाहीमाफी’ मा

जूड़ी बोखार हमरे बाटै
लिखि द्‌या बाकी ठीकै बाटै
भैं’सिया बियानी बा पड़िया
गइया बिकात नाहीं बाटै
सुरसतिया सरियारिग होइ गै
कसि मा नाहीं बाटै हमरे
अब वोकर गवन जरूरी बा
निबकावै क् बा निबरे-पतरे
समधी अबकी मागैं अइहैं
तौ मान जाब हम अगहन मा
यकतनहा नीम कै पेड़ गवाह
बचा बा ‘पाहीमाफी’ मा

पकरे हाथे अन्तरदेसी
मुस्की मारैं नइकी भउजी
चुप्पे अइसन पाती लिखि द्‌या
घर भागा आवैं परदेसी
लिखि द्या कि बहुत अगोरी थै
ससुरे मा नाहीं लागै मन
दस दिन कां ताईं आइ जायँ
नाहीं, चलि जाब नइहरे हम
बुढ़ऊ कै मुंह फूला बाटै
मनिआडर पाइन देरी मा
यकतनहा नीम कै पेड़ गवाह
बचा बा ‘पाहीमाफी’ मा

लिखि द्‌या घर कां जब्बै आया
खुब नीक-नीक साड़ी–साया
अन्दर वाली दुइ ठू बंडी
यक लाल लिपिस्टिक लइ आया
सेंनुर औ’ टिकुली ना लइहैं
बस क्रीम-पाउडर लइ अइहैं
महकौवा साबुन यक दरजन
पाये पइहैं तौ लइ अइहैं
यक बहुत खुसी कै बात बाय
लेकिन लिखिबै ना पाती मा
यकतनहा नीम कै पेड़ गवाह
बचा बा ‘पाहीमाफी’ मा

चिट्ठी न केहू कां दिखलाया
ना सास-ससुर कां बतलाया
धइ ल्या किताब के बीचे मा
सीधे डाखाना लइ जाया
वै खड़ी–खड़ी अँगिरायं बहुत
बोलिन अच्छा अब जात हई
चुप्पै बिहान हम दइ जाबै
यक कलम नीक कै धरे हई
माई बोलिन हरजाई बा
ना आया यकरे बाती मा
यकतनहा नीम कै पेड़ गवाह
बचा बा ‘पाहीमाफी’ मा

भउजाई कै गदरान गाल
हथवा-गोड़वा कुल लाल-लाल
बोलैं तौ मुंह से फूल झरै
पायल झनकावत चलैं चाल
चिट्ठी लिखवाइन तब जानेन
अंदरखाने कै बुरा हाल
पहिले खुब छटकत चलत रहीं
अब तौ बिलकुल भीगी बिलार
बैरंग वै पाती लिखवावैं
पइसा नाहीं जब जेबी मा
यकतनहा नीम कै पेड़ गवाह
बचा बा ‘पाहीमाफी’ मा

छोटकना पढ़ै नाहीं जातै
बड़कनी सयान हुवत बाटै
गोहूँ सीचै ताईं पइसा
फूटी कौड़ी नाहीं बाटै
घर कै बटवारा भवा बाय
यक ठू पाये बाटी कोठरी
बाटै वोरान रासन-पानी  
कुछ पइसा भेज दियौ जल्दी
बड़कऊ कै नीयत बिगड़ी बाे
वै बहुत सतावत हैं हमकां
यकतनहा नीम कै पेड़ गवाह
बचा बा ‘पाहीमाफी’ मा

लेकिन तू फिकर न किह्यौ कभौं
दहकच्चर-करकच झेल लियब
जिउ-जान से ठान लिहे बाटी
लरिकन ताईं अब जियब-मरब
दीवार फोरि कै रहत हई
कोठरी मा दरवज्जा नाहीं
बस साल-खांड़ दिन काटै क् बा
यहि घर मा अब रहिबै नाहीं
माटी कै भीत उठाइब हम
सरिया के बगल जमीनी मा
यकतनहा नीम कै पेड़ गवाह
बचा बा ‘पाहीमाफी’ मा

लिखि द्‌या भइया कसि कै लिखि द्‌या
लिखि द्‌या कि जल्दी आइ जांय
अम्मा बीमार अवाची हैं
गटई बोलअ थै सांय-सांय
हम अपने घर लइ आयन हैं
बड़कऊ की वोरी रहत रहीं
अब चला-चली कै बेरा बा
कुच्छै दिन कै मेहमान हईं 
आवा मुंह देखि लिया जीतै
अटका परान बा तूहीं मा
यकतनहा नीम कै पेड़ गवाह
बचा बा ‘पाहीमाफी’ मा.

__आशाराम जागरथ

[जारी….]